Ingelegde Kerrievis

Lynette Muller
Hoe langer die vis in die kerriesous bly, hoe geuriger word dit. Dit kan op sy eie ’n ligte ete wees, of dit kan voorgesit word as ’n hoofmaal met brood, botter en konfyt.

Bestanddele
1 kg stokvisstukke
sout en varsgemaalde swartpeper na smaak
250 ml (1 k) koekmeelblom
2 ekstragroot eiers, geklits
125 ml (½ k) kookolie
Kerriesous
3 groot uie, geskil en in skywe gesny
375 ml (1½ k) bruinasyn
60 ml (¼ k) water
45 ml (3 eetl) suiker
5 ml (1 t) borrie
10 ml (2 t) kerriepoeier
1 ml fyn paprika
4 lourierblare
8 peperkorrels
sout na smaak

Metode
Plaas visstukke in ’n bak. Indien bevrore vis gebruik word, laat ongeveer 30 minute staan om effens te ontvries. Meng geurmiddels met meel. Rol vis in die gegeurde meel. Verhit ’n braaipan met olie. Dompel vis in die geklitste eier en plaas direk in die warm olie. Braai vis vir ongeveer 5 minute aan elke kant of tot goudbruin. Verwyder uit olie en dreineer.

Sous:
Kook al die bestanddele saam in ’n swaarboomkastrol vir ongeveer 10 minute. Plaas die helfte van vis op bodem van ’n diep opdienbak. Giet die helfte van uiemengsel oor. Herhaal met vis en sous en plaas in yskas oornag sodat geur kan deurtrek.

Bediening
Bedien die vis met hotcross buns, broodrolletjies of selfs kapokaartappels.

Variasies
Vervang die stokvis deur kabeljou of enige ander vis van jou keuse. Die filette kan in enige groottes of vorms gesny word.
Kruie van jou keuse kan ook bygevoeg word. Speserye soos koljander en komyn kan ook gebruik word.

Print Friendly, PDF & Email
Advertisements
 

EIERVERRASSING  EN  MIELIERYSSLAAI

Rika Theron

Bestanddele en Metode
Sny 6 hardgekookte eiers in lengte middeldeur en skep eiergeel uit. 
Meng ‘n bietjie mayonnaise, 2 e gevlokte, ingemaakte salm of gevlokte skelvis of fyngekerfde hoender,
1 e gekapte selderystingels,
1 t fyngekapte pieterselie,
1/2 t Franse mosterd,
Worcestersous en geurmiddels na smaak met die goed fyngedrukte eiergele tot die mengsel romerig, maar nogtans nie pap is nie. 
Geur na smaak.  Skep vulsel terug in eierwitte en druk 2 halwe eiers weer opmekaar vas. 

Wenk
Die halwe eiers kan natuurlik ook so gelaat word, maar vir die kosblik is dit beter om dit opmekaar te druk.  As daar van die vulsel oorbly, kan dit vir toebroodjies gebruik word.  Plaas die gevulde eiers op mielierysslaai in ‘n klein lugdigte bakkie en verseël.  

MIELIERYSSLAAI
Meng
1 k gaar mielierys.
1/2 t borrie,
2/5 k gevlokte salm of hoender of skelvis,
1 e asyn,
1 e gekapte uie,
1 t Worcestersous,
1 e gekapte pieterselie,
1 e mielie-olie,
1 e gekapte rooi pimento en sout en peper na smaak saam en skud liggies. 
Skep onder op die boom van ‘n lugdige bakkie en rangskik die eiers bo-op.

Print Friendly, PDF & Email
 

Prawns

Rahanja

Bestanddele
125ml botter – gesmelt
1 suurlemoen in skyfies gesny
1 tot 2 eetl droe Italian seasoning 
2 tl garlic (vars of gedroog)

Metode
Pak prawns in oondpan. Gooi botter oor. Sit die suurlemoenskywe bo-op die botter en prawns neer. Sprinkel die Italian seasoning en garlic oor. Sit in voorverhitte oond vir 15 min by 350grade F (175grade C)

Print Friendly, PDF & Email
 

KERRIEVIS

Lynette Muller

Bestanddele Sous
275 ml asyn – meer of minder na gelang van die sterkte wat u gebruik.
30 ml appelkooskonfyt
125 ml water
10 ml sout
25 ml kerriepoeier – matig sterk
2 – 5 ml peper
50 ml suiker
100 g sultanas
25 g margarien of botter
10ml borrie
4 Lourier of suurlemoenblare.

Bestanddele Vis
6 Groot uie
2 Kg stokvis in mote gesny en met sout en peper besprinkel.

Metode Vis
Bak gaar in vlak warm olie.
6 Groot uie in ringe gesny en in bietjie olie en margarien gebraai tot gaar. (Maar nie bruin nie.)
Pak gaar vis wat in netjies porsies gebreek is en grate verwyder is, in ‘n erde of glashouer in lae om die beurt met gesmoorde uie.

KERRIESOUS:
Berei voor in dieselfde pan waarin die uie gesmoor is.
Smelt margarien oor lae hitte, braai droë bestandele effens daarin, roer appelkoskonfyt by, voeg lourierblare en sultanas by en dan die asyn en water.
Bring stadig tot kookpunt, kook ongeveer 10 minute en gooi oor voorbereide vis.

N.S. Proe gerus eers of die sous nog ‘n bietjie asy, sout of suiker benodig. Die sous mag effens verdik word met ± 12 ½ ml meelblom wat saam met die droë bestandele gemeng is, maar dit is nie aan te beveel as u die vis vir ‘n redelike lang tyd wil bewaar nie.

Hierdie vis word, nadat dit afgekoel het, bedek en in yskas geplaas. Gereed na sowat 3 dae.

Print Friendly, PDF & Email
 

TUNA-GROENTESKOTTEL

Rika Theron  

(6 porsies)

Bestanddele
1 blik tuna,
1 blik ertjies of suikermielies,
6 murgpampoentjies, in ringe gesny,
1 pakkie sampioensop, dik aangemaak met water of melk,
200 g Cheddarkaas, gerasper,
50 g broodkrummels.

Metode
Pak al die bestanddele in lae in vuurvaste bak.  Hou ‘n bietjie kaas opsy om bo-op krummels te strooi.  Bak 20 – 30 min (160°C) .  Bedien met volgraanbrood en gemengde slaai.

Print Friendly, PDF & Email
 

KERRIEVIS

Lynette Muller

Groot stokvis, snoek, geelbek of varswatervis

Kerriesous
5 ml fyn knoffel (opsioneel)
1 lourierblaar
750 ml bruin wynasyn
30 ml matige kerriepoeier
5 ml borrie
15 ml gemengde speserye
3 ml elk gemaalde gemmer en kruienaeltjies
2 ml gedroogde tiemie
3 ml rooipeper
5 ml paprika
250 ml suiker
250 ml wit wyn (die goedkoper soort werk ook goed)
5 ml matige mosterdpoeier
15 ml sultanablatjang
5 ml sout
65 ml fyn appelkooskonfyt
4 groot uie, in ringe gesny

Metode Vis
Stel oond op 180°C. Maak die vis skoon, sny in kleinerige mote (nie te groot nie) en geur met sout. Plaas in ‘n oondpan met ‘n bietjie olie en bak bruin aan albei kante, sowat 30 minute.

Vir die sous: Plaas al die bestanddele vir die sous, behalwe die uie, in ‘n groot emaljekastrol en roer tot kookpunt. Laat prut 5 minute tot goed deurgekook. (Indien verkies, verdik met sowat 7 ml mielieblom opgelos in bietjie koue water.)

Rangskik ‘n enkellaag vis in ‘n plat glas-, emalje- of keramiekbak, skep ‘n laag uie bo-op, gevolg deur ‘n laag kerriesous. Herhaal tot die bestanddele opgebruik is. Laat afkoel, plaas in die yskas tot heeltemal koud en bedek. Laat sowat 3 dae staan voor gebruik. Hoe langer die vis in die yskas bly, hoe beter die geur.

Dien op as hoofmaal met lekker brood, botter en korrelkonfyt. Dit kan op sy eie ‘n heerlike ligte ete wees.

Print Friendly, PDF & Email
 

Sardynbredie met krummelpap

Koekoes Vorster

Bestanddele
15 ml (1 e) vinkelsaad
5 ml (1 t) komynsaad
2 kardemompeule
5 ml (1 t) koljandersaad
15 ml (1 e) olie
1 ui, gekap
3 knoffelhuisies, gekap
1 blik (410 g) heel kersietamaties
1 blik (400 g) sardyne in tamatiesous
1 blik (400 g) botterbone in tamatiesous
1 blik (400 g) groenbone

krummelpap vir voorsit

Metode
1 Verhit ’n droë pan oor matige hitte en rooster die speserye tot geurig. Verplaas na ’n meul of vysel en maal fyn.
2 Verhit die olie in ’n kastrol oor matige hitte en soteer die ui tot deurskynend. Roer die knoffel en tamaties in en kook 10 minute of tot effens verdik. Roer die sardyne in en kook 5 minute.
3 Voeg die botterbone en groenbone in en maak deurwarm. Sit voor met pap.

Hope Malau http://huisgenoot.com

Print Friendly, PDF & Email
 

SNOEK OOR DIE KOLE

Lynette Muller

Bestanddele
1 Snoek vooraf gesout
Appelkoos Braaisous:
60 ml mayonnaise
60 ml knoffelbotter
60 ml gladde appelkooskonfyt
of
Mayo-Braaisous:
250 ml mayonnaise
90 ml botter

Metode
Plaas die vis oop met die velkant na onder op die rooster. Sprinkel peper oor. Verhit die bestandele vir enige van die braaisouse oor lae hitte en meng goed. Gebruik ‘n klein kwassie en verf die vleiskant van die vis met die sous. Braai oor gloeiende kole – nie te warm nie – tot die vis maklik van die graat loskom. Sit voor met vars brood en slaai of tamatie-en-uie-braaibroodjies

Print Friendly, PDF & Email
 

Vars Stompneus op die Kole

Jan van Niekerk

Bestanddele:
1 Stompneus per persoon
Botter
Vars kruie soos salie
Suurlemoen
Olyfolie
Growwe sout

Metode:
Skraap die vis se skubbe mooi skoon af.
Sny vis oop en verwyder die binnegoed.
Was die binnekant mooi skoon uit
Droog vis af met handdoekppier
Vul die pens met genoeg botter, vars salieblare en ‘n skyfie suurlemoen.
Smeer olyfolie en growwe sout op die vel.
Braai vis op kole wat nie te warm is nie. Hou jou vis dop.
Die vis moet gaar en sappig wees nie droog nie.
Bedien met bottergebraaide patats met komyn oorgesprinkel.

Print Friendly, PDF & Email
 

ARMANS-PAELLA

Bestanddele
375g Russiese worsies, in ringe gesny
1 groot ui, fyngekap
7ml matige kerriepoeier
375ml gaar rys
250g gaar hoender, in blokkies gesny
500g gaar skelvis, gevlok
125ml bevrore ertjies
125ml bevrore pitmielies
2 eiers, geklits
125ml melk
sout en vars gemaalde swartpeper
2 hardgekookte eiers, in ¼ gesny

Metode
Braai die worsies in ‘n bietjie olie tot bruin.
Skep uit en hou eenkant. Braai die ui tot sag,
Voeg die kerriepoeier by en roerbraai 1 minuut lank.
Voeg die rys by en roerbraai nog
ongeveer 1 minuut lank.
Skep die worsies terug.
Voeg die hoender by en meng.
Voeg dan die skelvis, ertjies en mielies by en meng liggies.
Verhit tot die groente ontdooi het en gaar is.
Meng die eiers en melk saam.
Giet oor die paella en roer tot die eiers gaar is.
Geur na smaak met sout en peper.
Skep op ‘n opdienbord en rangskik die eierkwarte rondom.
Lewer 6 porsies.

Geleen uit Anna Eksteen se boek “ietsie van alles”

Print Friendly, PDF & Email