Kebabs

Streng gesproke is ‘n “kebab” ’n stukkie vleis wat op die rooster gebraai is. Die benaming is egter algemeen aanvaar vir stukkies vleis wat op vleispenne geryg en gebraai word. Die korrekte benaming vir hierdie vleisgereg is eintlik Sjisj kebab (Turkse woord). (Sjisj – vleispen of stokkie, kebab – om te rooster). Vleisblokkies kan afgewissel word deur uie, sampioene, groen- of rooi soetrissie, skyfies murgpampoen of pynappel of enige ander geskikte groente of vrugte. Die sukses van ’n kebab word bepaal deur die marinade waarin die vleis vooraf geplaas, of waarmee dit bedruip word gedurende die braaiproses. Nadat die vleis gemarineer is, word dit op die vleispenne geryg. Die beste vleispen om te gebruik is die plat metaaltipe. Hout- of bamboesstokkies kan in water geweek word om te verseker dat dit nie skroei nie. Vir die beste resultate word kebab oor die oop vuur gerooster of ongeveer 100mm onder die roosterelement van die oond geplaas (laat oonddeur effe oop). Wees versigtig vir te lank gaarmaak. Lamsvleis en beesvleis behoort bruin buite maar liggaar (pienk) binne te wees. In sommige gevalle kan dit ook in die marinadesous in ’n oondkasserol gaargemaak en dan net vinnig onder die oondrooster geplaas word om te verbruin.

Kebabs is ’n ekonomiese, maar feestelike gereg om aan die gesin of kuiergaste voor te sit. Heelwat minder vleis word per persoon benodig, dus is dit goedkoper en gesonder. Die meeste voorbereiding kan vooraf gedoen word sodat die gasvrou gesellig kan saamkuier.

Bediening met rys:

Kebabs word gewoonlik met gewone wit of bruin rys en ’n bypassende sous bedien. Gegeurde rys of ’n rysgereg kan met spesiale geleenthede gebruik word.

Bediening met pitabrood:

Pitabrood of platbrood word in twee lae verdeel en die kebab word binne-in geplaas, effe vasgedruk en die vleispen word verwyder sodat die stukkies vleis agterbly in die koevertjie. Tabouleh (Libanese koringslaai kan bygevoeg word).
Hoenderkebabs met grondboontjiesous:

Marinade:
15ml ligte bruin suiker
3ml kerriepoeier
30ml growwe grondboontjiebotter
60ml sojasous
60ml suurlemoensap
2 huisies knoffel (fyngemaak)
5ml vars gemmer (gerasper)
2ml droë chillipoeier
125ml hoenderaftreksel
Kebabs:

2 hoenderborsies (ontbeen, repies gesny)
mielieblom of room (om sous te verdik)

Metode

Meng die bestanddele van die marinade. Plaas in ’n plat plastiese houer met ’n deksel.
Ryg die hoenderrepies heen-en-weer (zig-zag) op die stokkies en plaas die kebabs in die marinade. Rol die kebabs in die marinade om dit goed te bedek.
Laat oornag in die yskas of vries.
Ontvries oornag in die yskas en braai oor die kole of onder die oondrooster.
Plaas die orige marinade in ’n klein kastrolletjie en bring tot kookpunt. Verdik met mielieblom of room en bedien saam met die kebabs.
Vinnige Russiese worsie-kebabs:

3 russiese worsies (in stukkies gesny)
8 kersietamaties
1 groot groen soetrissie (in 12 vierkante gesny)
8 gepiekelde uitjies
1 blikkie pynappelstukkies (205g)
125ml voorbereide braai-tamatiesous
Soet-en-suur viskebabs

Die vis in hierdie resep kan vervang word deur hoender- of varkvleis. Vir ’n spesiale ete kan die stokvis vervang word deur koningklip of garnale of ’n kombinasie daarvan. Tongvisfilette wat opgerol en ingeryg word, is baie spesiaal.

Sous vir bediening:

15ml olie
10ml vars (gerasper) of 5ml fyn gemmer
2 huisies knoffel (fyngemaak)
60ml tamatiesous
60ml rissiesous
10ml suiker
15ml sojasous
10ml droë sjerrie

Kebabs :

500g stokvis (varkvleis of hoender) (in blokkies gesny)
1 groen soetrissie (gesny in vierkante)
1 rooi soetrissie (gesny in vierkante)
1 x 410g blikkie pynappelstukke

Marinade:

30ml sojasous
1 huisie knoffel (fyngemaak)
5ml vars gemmer (gerasper) of 3ml gemmer
60ml sonneblomolie
10ml droë sjerrie
10ml suiker

Metode

Meng die bestanddele vir die marinade en plaas in ’n plat houer.
Plaas die vis- of vleisblokkies in die marinade en laat in die yskas vir ongeveer 1 uur.
Ryg die gemarineerde vis of vleis alternatiewelik met die groen en rooi soetrissie en pynappelstukke op die vleispenne.
Plaas terug in die marinade en hou gereed om te braai.
Berei intussen die sous. Meng al die bestanddele vir die sous, behalwe die sjerrie, in ’n klein kastrol en verhit stadig totdat dit begin kook. Roer en laat kook vir 4 minute.
Roer die sjerrie by en verdun met water indien nodig. Hou warm tot gebruik.
Verwyder die kebabs uit die marinade en braai oor die kole of onder die oondrooster totdat die vis of vleis gaar is. Bedruip voortdurend met die orige marinade.
Bedien op rys. Sit voor met soet-suur sous.
Beesvleis-en-groentekebabs

1kg beesfilette of kruisskyf (in blokkies gesny) (lewer ongeveer 10 kebabs)
20 stukkies of blokkies van elk van die volgende (kies 4 – 5 soorte)
Murgpampoenskyfies, vlapampoentjies, klein uitjies of uisegmente, groen of rooi soetrissie, kersietamaties, pynappel, gekookte aartappel, sampioene, geweekte droëvrugte (appelkose of perskes)

Marinade:

125ml wit of rooi wyn
125ml sonneblomolie
50ml worcestersous
10ml tamatiesous (opsioneel)
10ml suiker
sout en varsgemaalde swartpeper

Metode

Ryg die vleis en die groente van eie keuse beurtelings op stokkies of vleispenne.
Meng die bestanddele vir die marinade en plaas in ’n plat bak.
Rol die kebabs een vir een in die marinade om hulle goed te bedek en laat dan die kebabs vir ongeveer 1 uur marineer.
Braai onder die oond se roosterelement of oor die kole. Bedruip gereeld met die marinade.
Braai tot die vleis mediumgaar en nie te droog is nie.
Bedien op gegeurde rys met ’n geurige tamatie- of peri-perisous.

Print Friendly, PDF & Email
(Visited 994 times, 1 visits today)
Advertisements

Leave a Reply

Your email address will not be published. Required fields are marked *