WILDVLEIS KASSEROL MET DROë VRUGTE:

Anna Eksteen

Bestanddele
1,5kg wildsvleis met bene in stukke gesaag.

MARINADE
500ml rooi wyn
4 knoffelhuisies, gekneus
10ml gedroogde gemengde kruie
100ml olie
30ml bruinsuiker
15ml Worcestersous
50ml botter
2 uie
1 wortel, gerasper
2 selderystingels, gekap
2 tot 3 lourierblare
6 heel naeltjies
6 wonderpeperkorrels
50ml vars suurlemoensap
500ml vleisaftreksel
250ml rooiwyn
500g droëvrugte
50ml maroela-jellie.

Metode
Marineer vleis twee dae lank in marinade. Verwyder vleis uit marinade en behou die vloeistof. Verhit botter en braai uie, wortel en seldery in swaarboompot. Braai vleis tot bruin en plaas in
kasserol. Skep uie-en-wortelmengsel bo- op. Gooi marinade oor. Voeg lourierblaar, naeltjies, wonderpeperkorrels en suurlemoensap by. Geur goed na smaak met aromat, sout en vars gemaalde peper. Plaas in oond en prut 3 uur lank by 160C. Vul vloeistof aan met rooi wyn en vleisaftreksel soos benodig. Vir ekstra geur kan 250ml room bygeroer word net voordat dit voorgesit word.

Print Friendly, PDF & Email
Advertisements

FYNGESTOOFDE WILDVLEIS

Joey Hanekom

1 kg nek, lies, of bors van wild
6 kruienaeltjies
3 lourierblare
1 huisie knoffel
10 peperkorrels
10 ml ( 2 t ) sout
2,5 ml ( 1/ 2 t ) peper
25 ml ( 2 e ) asyn
62 ml ( ¼ k ) rooi soetwyn, indien verkies
50 g varkspek

Vee die vleis met `n klam doek af en sny dit in stukke.
Plaas die vleis en spek, in repies gesny, in `n swaar kastrol en gooi genoeg water oor om dit net te bedek.
Voeg die naeltjies en die peperkorrels by en laat dit 3 tot 5 uur lank stadig oor lae hitte of in `n stadige oond by 120 C tot 150 C ( 250 F tot 300 F ) stowe.
Voeg die and kruie, sout en asyn by nadat dit 2 uur lank gestowe het.
Haal die naeltjies en die peperkorrels uit en voeg die wyn by `n halfuur voor dit klaar gekook het. Die sous kan met meelblom verdik word wat met koue water gemeng is, indien verkies.
Die vleis moet maklik van die bebe afkom as dit gereed is. Verwyder al die bene en die velletjies en maak die vleis met `n vurk fyn.

L.W. Dit kan ook gebruik word in pastei.

Print Friendly, PDF & Email

WILDSVLEIS oftewel GEMAALDE VLEIS BREDIE MET GEBAKTE PERE EN SKORSIES

Resep en foto:  Skeerpoort Skillie

Ingestuur deur Peet Mulder

Bestanddele
750 g Wildsvleis gemaal of Beesmaalvleis
2 x groot uie een opgesny die ander een fyn gerasper
100gr blok spekvleis in klein blokkies gesny
250gr ontvriesde  ertjies, hou eenkant moenie kook nie
2 wortels, in klein blokkies  gesny
3 blokkies biefekstrak in warm water opgelos
2 groot aartappels, in blokkies gesny
4 x tamaties geskil en opgekerf
1 koppie water
Olie
sout en peper na smaak
60ml gemaalde koljander
Knypie gemaalde naeltjies
40ml neutmuskaat
Knypie rooipeper
Mengsel van mielieblom, bruin uiesop, room van tamatiesop, room van sampioensop en bisto
2 X kwepers in kwarte gesny stronk en pitte verwyder
Suurlemoensap
Bruinsuiker
Botter
1 x koppie Gaargemaakte stampmielies of rys (hier het ek rys gebruik)
Skorsies in die helfte gesny en pitte verwyder

Metode vir die vleis

  • Braai die gekerfde ui in die olie tot goudbruin.
  • Met jou hande werk die spek, vleis en droë bestanddele goed deur asook die gerasperde ui
  • Braai die maalvleis mengsel tot amper gaar roer nou die gekerfde tamaties by
  • Voeg die koppie water en groente by behalwe die ertjies
  • Laat dit vir 20 minute prut tot dit sag is.
  • Voeg die ekstrak by en prut vir nog 10 minute.
  • Ek voeg nou ‘n mengsel van mielieblom, bruinuiesop, room van tamatiesop, room van sampioenesop en bisto by
  • Prut tot sous verdik
  • Verwyder van hitte en roer nou die ertjies by
  • Bedien op die stampmielies./rys

Metode vir die kwepers

Voorverhit oond tot 200ᵒc

  • Sprinkel die kwepers dadelik met suurlemoensap
  • Smeer nou die kwepers met die botter
  • Sit die kwepers in ‘n oondvaste skottel.
  • Plaas die oondskottel in ‘n bak met water
  • Sprinkel nou die bruinsuiker oor die kwepers
  • Bak in die oond tot sag en gaar
  • Maak intussen die skorsies gaar (ek verkies om dit te stoom)
  • Plaas bietjie botter in die skorsie en sprinkle bruinsuiker oor

OPDIENING;

  • In die middle van die bord skep die stampmielies/rys
  • Skep nou die vleismengsel bo-op
  • Rangskik nou die kwepers en skorsies weerskante

 

Print Friendly, PDF & Email

WILDSVLEISBOBOTIE:

Deur Anna Eksteen

Bestanddele
50ml olie
1 ui, gekap
15ml kerriepoeier
750g gemaalde wildsvleis;
7ml sout
37,5ml bruin asyn
37,5ml fyn appelkooskonfyt
1 Granny Smith-appel, grof gerasper
50ml pitlose rosyne
1 sny witbrood
350ml melk
2 eiers
5ml borrie
4 vars suurlemoen- of lourierblare.

Verhit die olie in ‘n swaarboomkastrol en soteer die ui tot sag en deurskynend. Voeg die kerrie
poeier by en braai dit 1 minute lank. Voeg die maalvleis by en braai dit totdat die vleis verbruin.
Voeg die sout, asyn, appelkooskonfyt, appel en rosyne by. Plaas die deksel op en prut dit 10
minute lank. Week die brood in melk. Druk die melk uit en voeg die brood by die vleismengsel.
Skep die vleismengsel in ‘n vuurvaste oondskottel. Klits die eiers en melk saam en voeg borrie
by. Druk die suurlemoen- of lourierblare in die vleismengsel en giet die eiermengsel bo-oor .
Bak dit 40 minute lank in ‘n voor verhitte oond teen 180C totdat die vla gestol het.

Print Friendly, PDF & Email

Ysberg Kropslaai

Maak ‘n hap
Bestanddele:
2 klein goed gevormde bros blaarslaaikoppe, elk gehalveer
Alternatiewelik een groot slaaikop, in kwarte gedeel
Sous:
Een hele wiggie bloukaas
150 ml room
50 ml wit asyn of suurlemoensap
Vleis:
1 volstruisfilet om en by 500 g
Willow Creek Jalapeño geur olyfolie
10 ml Braaispeserye
10 ml fyn Kaneel
Vanieljesaadjies van ‘n halwe peul
Waatlemoen in  dobbelsteentjies gesny
Jy kan ook nektarienskyfies of vars vye effens karameliseer
Metode:
Vryf die volstruisfilet goed met die Jalapeño-olie, speserye en vanieljesaadjies. Braai liggaar en goed verbruin in ‘n warm pan en laat rus die vleis. Verpulp die kaas, room en asyn saam tot ‘n lekker dik slaaisous en giet bo-oor die Kropslaai. Indien die sous baie dik is, kan jy dit effens met koue water verdun. Dit gaan van jou roomgehalte afhang, maar jy wil ‘n lekker dik, loperige sous hê. Sny die vleis in flentertjies en rangskik rondom die slaai saam met die vrugte. Bedien saam met ‘n  heerlike effens verkoelde Pinotage.
Wenk:
Hierdie slaai kan sonder die vleis bedien word
Print Friendly, PDF & Email

Appelkose en Volstruis boerepastei

Bestanddele
Genoeg vir 6 persone
250 ml gedroogte appelkose, fyn gekap
160 ml rooiwyn
1 ui
5 ml komyn
5 ml koljander
2 ml rooipeper
2 ml sout
500 g volstruismaalvleis
4 groot aartappels
50 g botter
100 ml room/melk
sout en peper na smaak

Metode:
Gooi die appelkose in die wyn en kook tot dat dit sag is. (ongeveer 5 minute). Kap die ui fyn en braai in 15 ml olyfolie saam met die komyn, koljander, rooipeper en sout. Gooi die maalvleis by en braai tot amper gaar (5 minute). Plaas in ‘n oondbak (vul dit 2/3 vol).

Maak die kapokaartappels:
Skil die aartappels en kook in soutwater tot sag. Druk die aartappels fyn saam met botter, room, sout en peper. Skep bo-op die vleis in ‘n oondbak en bak teen 200 grade vir ten minste 15 minute. Bedien met vars koljanderblare en blatjang.

Pruim blatjang:

Bestanddele
6 pruime, vyn gekap
60 ml suiker
100 ml water
2 rooibosteesakkies
50 ml asyn

Plaas al bestanddele in ‘n pot en kook totdat dit taai word. Verwyder die teesakkies voor jy dit bedien.

Print Friendly, PDF & Email

Widsvleishappies

www.ontbytsake.co.za

Genoeg vir 6 persone

Bestanddele
1 pakkie filodeeg
100 g botter (gesmelt)
500 g wildsvleis
2 ml swartpeper
15 ml olyfolie
5 ml kerriepoeier
5 ml komynpoeier
2 ml sout
4 kardamomhuisies se saadjies
6 murgpampoentjies, in repies gesny
250 ml kookwater
250 ml witasyn
80 ml suiker
5 ml mosterdsade
5 ml vinkelsade
Sout en peper na smaak
200 ml mikroblare
100 ml Dewfresh suurroom
5 basiliekruidblare, fyn gekap
8 grasuie, fyn gekap
6 gedroogte appelkose, (gekook in 100 ml water, 100 ml rooiwyn en 80 ml suiker)

Metode:
Marineer die wildsvleis in die olie, kerrie, komyn, en kardamom. Meng die basiliekruid en grasuie in die room en los in die yskas.

Vir die ingelegte murgpampoentjies:
Meng die water, asyn, suiker, mosterdsade en vinkel sowel as ongeveer 2 ml sout en peper saam. Gooi die murgpampoentjies in en los vir ten minste ‘n uur. Gooi die asyn/water mengsel uit voordat jy dit bedien.

Sny die filodeeg in reghoeke en smeer botter tussen elke laag. Sit 3 lae bo-op mekaar en vorm om die onderkant van ‘n kolwyntjiepan. Sit ‘n ramekinbakkie bo-op en bak teen 180 grade vir 10 minute.

Gooi die vleis nou in ‘n warm pan en braai in die botter na smaak. (mediumgaar vir ons op stel) Gooi sout oor en meng.

Om die mandjies op te stel, skep van die murgpampoentjies onder in die filodeegmandjies, gevolg deur suurroom, appelkose, vleis en mikroblare.

Print Friendly, PDF & Email

ANNATJIE REYNOLDS se Wildspastei

Dankie vir die resep Okkie

SODAWATER-PASTEIDEEG
500 ml koekmeel                                                            
2,5 ml sout
250 g koue botter, in blokkies gesny     
100 ml yskoue sodawater
20 ml brandewyn
Sif die meel en sout saam.
Gooi die botterblokkies by en vryf dit met vingers by die meel in totdat dit soos broodkrummels lyk. Gooi sodawater en brandwyn by en meng dit tot ’n stywe deeg. Bedek die deeg met kleefplastiek en laat dit vir ’n uur in die yskas rus. Rol die deeg op ’n meelbestrooide oppervlak in ’n reghoek uit. Vou die reghoek in drie lae oor mekaar en draai die gevoude reghoekie dwars voor jou. Herhaal die rol-en-vouproses nog twee keer. Bedek die deeg en laat dit vir nog 20 minute in die yskas rus. Herhaal nou die vouery nog drie keer.
         
 WILDSVULSEL
1 groot ui, gekap                                                                                  
sonneblomolie
500 g lamskenkels                                                                             
1,5 kg wildsvleis (skenkels, nek of blad)
omtrent 750 ml hoenderaftreksel, (genoeg om die vleis te bedek)
3 eetlepels gemaalde koljander, gerooster          
1 teelepel wonderpeper en/of naeltjies (opsioneel)
1 teelepel witpeper                                                                            
3 teelepels sout
3 eetlepels bruin asyn                                                                      
1 eetlepel brandewyn
2 eetlepels koekmeel, met ’n bietjie water gemeng tot ’n pasta
1.          Gebruik ’n swaarboomkastrol en braai ui in warm olie tot deurskynend. Skep die ui uit en braai dan die lamskenkels tot mooi bruin. Gooi nog olie of vet by, indien nodig. Skep die skenkels uit met ’n gaatjieslepel en braai dan die wildsvleis bruin. Skep dit ook uit.
2.         Gooi die res van die bestanddele (behalwe die meelpasta) in die pot en verhit dit totdat dit begin kook. Skep die bruingebraaide vleis en ui terug in die pot. Sit ’n styfpassende deksel op en laat dit stadig prut totdat die vleis sag is en van die bene begin afval. (+ -2½ uur.)
3.         Skep die bene uit en verdik die vleismengsel met die meelpasta. Proe en gooi nog sout of peper by, indien nodig. Skep die vleis in ’n groot pasteibak en laat dit eenkant staan om heeltemal af te koel.
4.         Bedek die vleis met ’n laag pasteideeg, verf dit met geklitste eier en bak dit vir ongeveer 45 minute in ’n voorverhitte oond (220°C) of totdat die kors goudbruin en gaar is.
Print Friendly, PDF & Email

WILDSBOUD

(Uit Kook en Geniet)
1 boud, ongeveer 2 kg                             
250 g varkspek
1 t fyn naeltjies                                           
1,5 e fyn koljander
1,5 e bruinsuiker                                        
1,5 e sout
halwe teelepel peper                              
knippie neutmuskaat
1 k asyn                                                          
125ml soetwyn
kweperjellie
Vee vleis met klam doek af en verwyder voorbeen.  Sny spek in lang repies van ongeveer 6 mm dik en 5 – 7 cm lank.  Meng al die ander bestanddele behalwe die laaste twee goed.
Laat spek ‘n halfuur in mengsel van speserye en asyn lê.  Lardeer die boud vleis daarmee deur met ‘n skerp mes diep snye in die vleis te maak.  Druk ‘n vinger in elke sny om dit te rek en druk dan ‘n stukkie spek daarin.
Sit die vleis in ‘n diep skottel en giet orige asynmengsel daaroor.  Laat dit 2 – 3 dae marineer en draai die vleis een keer om.  Haal die vleis uit die marinade, druk dit effens droog met ‘n doek en braai in ‘n pot.  Voordat jy dit braai, vryf die oppervlak in met ‘n mengsel van koekmeel, sout en peper.  (125 ml meel, 2 t sout en halwe t peper.)  Verhit halwe k botter/olie in kastrol en plaas vleis daarin.  Braai vinnig bruin aan albei kante sonder om die deksel op te sit.  Voeg halwe k kookwater by en maak dig toe.  Verminder hitte en laat 2 – 3 uur lank stadig stoom.  Voeg telkens bietjie water by wanneer dit begin braai.  Draai vleis een keer om terwyl dit stoom en laat dit teen die einde van die tyd bruin braai.
Om die sous te maak, word al die vet behalwe 15 ml afgegooi.  Voeg dan kokende water by.  Roer dit goed en laat kook.  Gooi uit in souspotjie.  (Om sous dik te maak:  Roer genoeg koekmeel by om al die vet te absorbeer, laat dit kook en roer aanhoudend tot dit mooi bruin is.  Voeg 250 – 500 ml kookwater by en roer tot dit kook.  Voeg sout en peper na smaak by en dien op. Voeg wyn by ongeveer 30 minute voordat braaityd verstreke is.
Sit die vleis voor met kweperjellie.
Print Friendly, PDF & Email

STOWEVLEIS

1,5 kg wildsvleis
100 g spek
water om te bedek                                   
8 kruienaeltjies
12 wonderpeperkorrels                          
4 lourierblare
2 knoffelhuisies                                          
1 t growwe sout
bietjie vars peper                                      
125 ml soet rooi wyn ops.
125 ml druiweasyn                                    
sap van 1 suurlemoen
Sny vleis in stukke en die spek in blokkies en sit dit in ‘n swaarboomkastrol.  ‘n Plaatboomysterkastrol is eintlik baie geskik hiervoor.  Bedek nou die vleis met water en voeg die kruienaeltjies, wonderpeperkorrels en lourierblare by en stowe baie stadig so ongeveer drie uur lank.
Nou word die knoffelhuisies, sout, peper, soet rooi wyn en asyn bygevoeg.  Prut nog ‘n uur of so.  Die vleis behoort nou darem al lekker sag te wees.  Voeg bietjie suurlemoensap by, laat vinnig deurkook en proe.  Voeg nog bietjie wyn of suurlemoensap by as dit nodig is.  Lig bene uit kastrol en laat vleis ‘n rukkie teen vinnige hitte kook as daar te veel sous in is.  Nou kan die stowevleis net so opgedis word, of mens kan heerlike pasteideeg daaroor sit en ‘n lekker groot pastei maak. 
Deeg:
375ml bruismeel                                         125 ml gesmelte botter
2 eiergele                                                      halwe t sout
62 ml melk                                                    2 eierwitte
Meng meel, gesmelte botter, eiergele, sout en melk.  Klits witte styf en vou in die deeg.  Sprei deeg oor fyn vleis wat reeds gaar is en bak tot ligbruin.
Print Friendly, PDF & Email