HOENDER EN VRUGTESLAAI

Rina

Bestanddele
800g gaar oorskiet-hoender, in stukkies gesny
2 nektariens, ontpit en in wiggies, gesny
2 geelperskes, ontpit en in stukkies gesny
½ spanspek, ontpit, geskil en in blokkies gesny
1 blik mango’s gedreineer en kleiner gesny
2 groen brandrissies, fyn gekap
25g vars koljanderblare, fyn gekap

SLAAISOUS:
30ml mayonnaise
60ml suurroom
sout en vars gemaalde swartpeper
15ml komynsaad, gerooster (opsioneel)

Metode
Meng die hoenderstukkies, vrugte, rissies en vars koljanderblare. Klits die mayonnaise en suurroom saam en klam die slaai liggies aan. Geur goed met sout en vars gemaalde peper en besprinkel met geroosterde komynsaad.

Bedien 6 mense.

Wenk
Jy kan enige vrugte van jou keuse gebruik, bv. Vye, mango of pere. Hierdie slaai sal heerlik wees saam met ‘n bruin saad broodjie

Advertisements

PERI-PERI-PLATHOENDERTJIE

Anna Eksteen
Koop ‘n vars plaashoender, sny die rugstring uit en druk die karkas plat met jou oop hand. Plaas oornag in ‘n appelpekelmengsel voordat dit op die braaivuur gaargemaak word.

Bestanddele Hoender
1 groot plaashoender

PEKELMENGSEL:
250ml vars appelsap
500ml koue water
62.5ml growwesout
80ml bruinsuiker
250ml fyn ys

Meng die appelsap, water, sout en suiker in ‘n groot beker. Plaas ysblokkies in ‘n skoon afdroogdoek, bind op en slaan fyn. Meet ‘n koppie vol en gooi by die res van die bestanddele.

BRAAISOUS:
62.5ml olyfolie
200ml peri-peri-bedek-en-kook-sous
1 groot toeritsplastieksak

Metode
Plaas die hoender in die plastieksak. Gooi die pekelmengsel oor en rits toe. Laat staan oornag in die yskas. Klad droog en verf aan albei kante met olyfolie. Braai tot halfgaar en begin dan die hoender met die peri-peri-sous verf. Draai af en toe om tot gaar. Voeg orige olyfolie by sous. Verhit en gooi oor die gaar hoender. Heerlik saam met slaai en pietersielie-aartappeltjies.

ROOI POTJIE VIR PA

Anna Eksteen
Gebruik ‘n nommer 3 potjie

1 kg hoender
fyn sout
growwe swart peper
koekmeel om stukkies in te rol.
2 medium uie fyn gekap
kook rys apart tot gaar.
10ml fyngemaakte gemmer en knoffel
20ml botter
10 klein aartappeltjies
10 jong worteltjies
10 klein vlapampoentjies
250g knopie sampioene

BESTANDDELE VIR DIE SOUS
300ml tamatiesous
50ml blatjang
20ml Worcestersous
2ml tabascosous
50ml asyn
50ml suiker
5ml mostertpoeier
15ml paprika
125 water

Metode Sous
Voeg alles bymekaar is ‘n bottel en meng goed deur die bottel te skud.

Metode Potjie
Maak jou pot warm en gooi botter by.Braai die fyngekapte uie en gemmer/knoffel tot die geur uitkom. Neem die hoender porsies en strooi individueel een vir een met fyn sout en peper. Nadat die gedoen is doop die hoender porsies in die koekmeel en voeg in die pot. Roer totdat die hoender porsies goed met die uie en olie bedek is vir so 10 minute. Gebruik ‘n houtlepel. Van nou af roer jy nie weer jou pot totdat jy opskep nie. Gooi nou jou sous soos bo saamgestel in en laat jou pot stadig loop. (Borrel liggies regdeur). Los so vir ongeveer 15 minute. Voeg nou jou groente in lae in die volgende volgorde. Aartappels, jong wortels, pampoentjies, en sampioene. Los so vir ongeveer 45 minute Voeg klaargekookte rys by so 10 minute voor opskep, en laat die sous deurkook. Die pot loop so 2½ uur.

KERRIE MARINADE

Lynette Muller
Maak 3 koppies

Bestanddele
2 uie, in repies gesny
2 k water
4 t kerriepoeier
2 e blatjang*
3 t borrie
3 e suiker

METODE:
Soteer die uie in ʼn pan tot sag (moet nie dit bruin braai nie) en voeg die water by. Bring tot kookpunt. Giet die kerrie en borrie by en roer die blatjang by. Laat dit goed deurkook en voeg die suiker by. Kook 5 minute. Haal van hitte af en laat afkoel. Bedek rooivleis met marinade en los 2 – 3 dae in die yskas voor dit gebraai word.

*Vervang die blatjang met appelkooskonfyt vir hoender en met appelasyn vir varkvleis.

Hoender In Melk

https://uitkykvleismark.co.za

Bedien 4
Dis die eenvoud van die resep wat die smelt-in-die-mond-hoender spesiaal maak.

Bestanddele
1 heel hoender
seesoutvlokkies
1 suurlemoen, in kwarte gesny
3 takkies tiemie
30 ml olyfolie
500ml melk
4 lourierblare
5ml heel peperkorrels
2 blikke wit bone, gedreinee

Metode
Oondtemperatuur- 160 °C Geur die hoender met die sout en sit die suurlemoen en tiemie in die buikholte. Braai nou die hoender versigtig in ‘n bietjie olie tot bruin oraloor en sit dit dan borskant na bo in ‘n diep oondbak met ‘n deksel. Giet die melk oor en voeg die lourierblare en peperkorrels by, bedek en bak vir sowat 45 minute. Roer die bone by en bedruip die hoender met die sous. Sit onbedek terug in die oond en bak vir nog 25-35 miute.

HOENDER  MET  SAMPIOENE

Rika Theron
2 porsies

Bestanddele:
15 ml olie
30 g botter
2 hoender Maryland-stukke (dye en boudjies)

Sous:
30 g botter
15 ml meel
125 ml melk
60 ml droë witwyn
220 g ingemaakte sampioene
2 ml tiemie
sout & peper
30 ml room
2 salotte.

Metode:
Verhit olie en botter in bakskottel.  Pak hoender in skottel en bak 35 – 40 minute in matige oond tot hoender sag is.  Borsel kort-kort met sous.  Skep sous oor hoender.

Sous:
Verhit botter in kastrol, voeg meel by en roer tot goudbruin.  Voeg melk en wyn geleidelik by.  Roer tot sous kook en dik word.  Voeg ongedreineerde sampioene, tiemie, sout & peper by en roer tot dit weer kook.  Roer gekapte salotte en room by.  Kook 1 minuut lank.

Soetsuur Hoender Gereg ~ Grootmaat

Jan van Niekerk

Bestanddele:
48 Hoenderporsies (boudjies, dye of borsies)
75 ml Kookolie
8 Middelslag uie (ongeveer 800gr)
6 x 410 gr Pynappelstukke in stroop
500 ml Hoenderaftreksel of pynappelsap
75 ml Sojasous
75 ml  Bruin druiweasyn
80 ml Bruinsuiker
15 ml Fyn Gemmer
40 ml Sout
5 Groen soetrissies ontpit en gekap
5 Rooi soetrissies ontpit en gekap
250 ml Mielieblom

Metode:
Skil en kap uie
Dreineer pynappels en hou stoop eenkant
Ontpit en kap soetrissie
Braai hoenderporsies bruin in verhitte olie in ‘n swaarboomkastrol
Voeg uie by en sorteer tot deurskynend
Voeg verhitte pynappelstroop, hoenderaftreksel, sojasous, asyn, suiker, gemmer en sout by
Verminder hitte, plaas deksel op en prut 1 uur of totdat hoender sag en gaar is
Voeg soetrissie en pynappelstukke by en prut nog 15 min
Verdik sous met ‘n pasta vn meilieblom en water

Asynhoender Jarnac – hierdie keer met room en mosterd

Oftewel Poulet au vinaigre de vin

Ons kook so maklik met wyn, maar hoekom nie ook met asyn nie?
12 klein uitjies (die soort wat vir piekels gebruik word)
45 ml olyfolie
60 g pancetta of ontbytspek, in blokkies gesny
250 g knopiesampioene, afgevee
3 knoffelhuisies, fyngekap
1 groot skrophoender, in 8 stukke opgesny
190 ml goeie rooiwynasyn (kan helfte met goeie balsemiekasyn aanvul)
500 ml hoenderaftreksel
3 lourierblare (vars of gedroog)
250 ml room
30 ml Dijon mosterd
Fyngekapte pietersielie vir garnering
Bedien met rys, kapokaartappel, fettucini of net groot hompe baguette.

Kook die uitjies skil en al in gesoute water tot die skille net begin loskom, dreineer en verwyder die skille.
Hou uie eenkant.
Verhit olie in ‘n groot swaarboompan en braai die spek of pancetta tot goudbruin.
Haal uit met gaatjieslepel en hou eenkant.

Soteer die sampioene tot bruin en voeg die gaar uitjies en knoffel by.
Soteer vir verdere 4-5 minute.
Maak seker dat die knoffel nie brand nie en die uie heel bly.
Haal uit met gaatjieslepel en hou eenkant.

Geur die hoenderstukke met sout en peper en braai in dieselfde pan sowat 10 minute aan ‘n kant.
Voeg die asyn, sampioene, lourierblare, spek of pancetta, uie- en knoffel, en hoenderaftreksel by.
Prut tot die hoender net-net van die been af loskook en die asyn se erg-suur versag het.
Voeg die room en mosterd by, proe en geur met sout en peper, laat liggies prut tot deurwarm (sonder om te kook, anders kan dit skif).
Skep saam met al die sous in ‘n warm opdienbak en strooi pietersielie oor.

Bron: https://huiskok.com/2019/06/28/franse-ervaring-uit-die-bootkombuis-die-lekkerste-skrophoender-met-asyn-room-en-mosterd/
Erkenning: ‘n hartlike dank aan Marius Du Plooy Toere.
Facebook-blad vir Marius Du Plooy Toere.
Foto’s: Ian Du Toit.

HOENDER-EN-MANGOKASSEROL

Rika Theron
6 porsies

Bestanddele:
30 ml botter,
1 ui, fyngekap,
2 mango’s, geskil en in stukkies gesny,
2 ml paprika,
10 – 15 ml kerriepoeier,
40 ml koekmeel,
275 ml hoenderaftreksel,
250 g knopiesampioene, fyngesny,
250 ml dik room, sout en varsgemaalde swartpeper na smaak,
1,3 kg hoenderborsies, ontvel en ontbeen en in stukkies gesny.

Metode:
Verhit oond (180°C) en smeer ‘n oondbak van 27 x 30 cm met margarien. Verhit botter en soteer ui en mango 1 minuut lank. Voeg paprika en kerriepoeier by en roerbraai ‘n verdere minuut lank. Voeg meel by en roer tot glad. Voeg hoenderaftreksel by en verhit tot kookpunt terwyl geroer word. Voeg sampioene by. Wanneer sous verdik en gaar is, verwyder van hitte en voeg room by. Rangskik hoenderstukkies in oondbak, giet sous oor en bak ongeveer 50 minute lank onbedek tot goudbruin en gaar. Dien op met rys of koeskoes en slaai of groente.

Beer Can Chicken, Bier blik hoender (of gebruik Coke)

Ek is al lankal lus om die resep te probeer.
Ek het uiteindelik en dit was heerlik en sappig.
Ek het die hoender in die Cobb braaier gaargemaak.
Maar hy kan op enige ander braaier (verkieslik met n deksel) gaargemaak word of selfs in die oond.
Bedek die hoender en hele pan met foelie indien jy dit in die oond doen.

Bestandele:
een heel hoender
6 medium aartappels
halwe blikkie bier of coke
foelie

Die speserye en geure is na smaak:
Maar hier is wat ek gebruik het:
Ongeveer 200ml olyf olie.
5ml gerookte sout flokkies
4ml naeltjies
22ml Ina Paarman Hoender speserye
15ml gegeurde gemengde kruie (Robertsons)
5ml knoffel vlokkies
meng goed en laat staan vir die geure om trek.

Skil 6 medium aartappels.
Plaas dit in  zip lock sakkie saam met ongeveer 80ml olyfolie en 10ml sout vlokkies.
Meng en rol dat al die aartappels bedek is met die olie laag in die sakkie.

As die vuur/hitte gereed is plaas die halwe  bier in die houer

Bier blik hoender houer

Smeer die hoender met die olyf mengsel.
Maak seker dit is n lekker dik mengsel dan loop dit nie net af nie.
Plaas hoender oor die blikkie/staander en draai foelie om die vlerkies en om die boudtjies se punte
Plaas dit in foelie bord bv n tert bord.
Draai die aartappels elkeen apart in foelie toe en plaas om die hoender.
Sit in jou braaier en maak die deksel toe.
Myne het ongeveer 2 ure geneem om gaar te word.

MY hoender het ongeveer 2 ure geneem om gaar te word, saam met die lekker gebakte aartappels

Waarna ek net die boudtjiesafgesny het en teruggeplaas het in die biersous
Die hoender het ek met foelie bedek en saam met die aartappels warm gehou op 90 grade.
Ek het gevriesde oven bake groente saam met die boudtjies gesit en daar was n heerlike ete gaar met min skottelgoed.

*My bier blikkie was te hoog. Ek het die bier oorgegooi in n kleiner koeldrank blikkie (Tonic water)

Solank jou braaier se hitte egalig bly behoort enige braaier te werk